परमचैतन्य श्री काणे महाराज बेळगाव

ब्रह्मानंदं परमसुखदं केवलं ज्ञानमूर्तिं l
द्वंद्वातीतं गगनसदृशं तत्त्वमस्यादिलक्ष्यम् ll
एकं नित्यं विमलमचलं सर्वधीसाक्षिभूतं l
भावातीतं त्रिगुणरहितं सद्गुरुं तं नमामि ll

ब्रह्मानंदरूपी, परमसुखदाता, केवळ ज्ञानस्वरूप, सुखदुःखादि द्वंद्वरहित, आकाशासारखा निर्लेप, तत्त्वमसि आदि महावाक्यांचे साध्य, एक, नित्य, विमल, निश्चल, सर्व प्राण्यांच्या बुद्धीचा साक्षी, भावातीत, त्रिगुणरहित अशा सद्गुरुंना मी नमस्कार करतो. गुरुगीते मध्ये भगवान महादेवांनी सद्गुरुंचे अतिशय सुंदर वर्णन केलंय.त्यांच्यापासूनच (आदीनाथापासून) सुरु झालेली गुरु - शिष्य परंपरा,सनातन वैदिक धर्मात,हजारो वर्षांपासून टिकून आहे.कोट्यावधी ब्रह्मांडांना व्यापून राहिलेल्या परमेश्वराचे स्वरूप नक्की कसं आहे आणि ते जाणून घेण्यासाठी, आपल्या शिष्यासाठी सहजसुलभ मार्ग कोणता याविषयी मार्गदर्शन करतात,ते सद्गुरु. शिष्यासाठी नुसताच सोपानमार्ग दाखवून ते थांबत नाहीत,तर त्या मार्गावर वाटचाल करताना,त्याला येणाऱ्या पारमार्थिक,सांसारिक अडचणीचे निवारणही ते करतात.परमेश्वराचे स्वरूप जाणून घेऊन,त्या स्वरूपात विलीन होणे,हेच मनुष्य जन्माचे अंतिम उद्दिष्ट असते.ते साध्य करण्यासाठी सद्गुरु हे मार्गदर्शक असतात. kanemaharaj.org या वेब साईट मधून,सश्रद्ध भक्तांना परमचैतन्य सद्गुरु श्री.काणे महाराज यांचे जीवन दर्शन,त्यांनी आपल्या प्रवचनामधून भक्तांना केलेला उपदेश आणि त्यांचे साहित्य याची ओळख करून देत आहोत.

ॐ सर्वे भवन्तु सुखिनः।
सर्वे सन्तु निरामयाः।
सर्वे भद्राणि पश्यन्तु।
मा कश्चित् दुःख भाग्भवेत् ॥
ll ॐ शांतीः शांतीः शांतीः ll